Lede-aontal Krink Mestreech sjut umhoeg!

Twie maond geleie haolde de krink Mestreech vaan Veldeke Limbörg nog gruuts 't 700e lid binne. Aofgeloupe week heet ziech alweer 't 800e lid bij aongemeld, meh 't hèlt mer neet op! D'n tèller steit op dit momint op 840 lede!

Veldeke Mestreech: "Dit wèlt zègke tot veer in twie maond tied 'n 140 nui lede debij höbbe gekrege. Gein inkel aander vereineging in Mestreech greujt op dit momint zoe gaw wie die vaan us. En dao zien veer gruuts op! 't Besluut um de kaartverkoup veur eus Vastelaovendscabberèt dit jaor ierleker te laote verloupe veur eus eige lede, heet dao zeker 'ne positieven invlood op gehad. Väöl lui kraoge in de gate tot ze zoonder lidmaotsjap dit jaor gein kaarte mie kóste kriege veur 't cabberèt. Dus toch nog gaw lid gewore! En eigelek vinde veer tot 't z'ch zoe ouch huurt. 't Vastelaovendscabberèt waor oersprunkelek, wie veer daomèt begóste op Fort Sint-Pieter, ouch allein mer touwgaankelek veur eus lede. Daoneve is 't zoe tot ei Veldeke-lidmaotsjap ouch gelt veur eure partner en/of eur kinder. Väöl nui lede melle ziech aon es koppel of femilie. Daovaan oetgaonde, dörve veer te zègke tot veer eigelek väöl mie lede höbbe es wat op d'n officiëlen tèller steit. Dee gief jummers allein 't aontal betaolde lidmaotsjappe aon. Veer hure evels ouch vaan väöl nui lede, tot zie ziech neet allein lid make vaan eus vereineging um de kaarte vaan 't volgend jaor zeker te stèlle. Zie zien tot de Veldeke Krink Mestreech ziech breid inzèt veur 't behaajd en bevordering vaan de Mestreechter taol en cultuur en tot eus doelstèllinge wijer goon es allein cabberèt."

Wèlt geer ouch lid weure vaan de Krink Mestreech vaan Veldeke Limbörg? Mel uuch aon via 't aonmelformuleer op www.veldekemestreech.nl..