Verhaol van d'r Huub Gubbels

Van Wikibrónne

Vanaaf de twiede repetiesje van d’r Piet van Can bin ich bie d’r drumband koame, dus ich bin èigelik van de ursjte lichting. Nao ’n sjtuk of tien repetiesjes mochte v’r os kinnis laote huere an de lede van de harmenie. De modelmarsje koste ver doe al. Naodat v’r de kostuums howwe kriège, zunt v’r veur de harmenie gaon laope, veur de zestien maote.

Nao d’r Piet krège v’r d’r Frans. Dè kaom oet Gullepe mit zienge DKW-brommer. D’r Frans lag de lat effekes e sjtukske hoeger en lierde os opnuuj roffele en aksente howwe. ’t Iersjte konkoer wat ich mitmakde waor in Kerkdriel. Effekes veurdat v’r moeste optrèje veel d’r Frans nog in, dat v’r och op koeste renne! Wat hubbe v’r dao applaus gehad en wat ‘nne sjoene pries.

Traiteur Latte is och ’n kier bie os langs gewes met z’n verplaatsjbare keuke. Dè lierde os mit mets en versjit eate. ’t Fiengste hub ich nog altied os limburgs kampioensjap in Echt vonde. V’r sjpeulde dao Jumping Circus en v’r klopde zelfs d’r sjriever van ’t sjtuk.


Och ’n prach herinnering is os deelname aan ’t WMC. Nao ’n sjoen opkoms moes v’r beginne. De ursjte noet how nog neet geklonke of de jury zat al ‘nne groete circel op ’t papier. D’r Jean Sjtriethage rende mit os mit mit d’r filmkamera en filmde ’t gaans gebeure. Dè film hub ich trouwens nooit gezieë. Bie ’t bekind make van de punte sjtong v’r allemaol mit de patsj in de heng um die in de loch te bruuje. Drumband Harmonie Berggalm, ‘nne twiede pries. Noch noets zoeveul traone gezieë es toen.

Mendig, dat is veur d’r drumband ’n verhaol apart. Die Pruusje wiste gaar neet wat ze huërde, wat v’r allemaol oet die tromme koeste hoale. En dan die verhaole van die jonges die mit de kusses oonder de erm euver de geng sjloape um bie de meid te koame. Es d’r Sjeu en d’r Thoes dit gewète howwe, dan hejje ze ging auw toe gedoa. Ich sjleep mit de Corrie en d’r Jo Kleene mit de Brigitte bie ‘nne Duutsje militair. Dat waor ‘nne vleegenier en dus moste v’r och mit de loch in in zien zjweefvleegmesjieng.

Van d’r optoch hub ich neet veul geloape. Wat v’r dao waal gedoa hubbe, is die Pruusje sjoes liere drinke. En v’r hubbe veul esjbek en glaazer in de hoes van de trom geduujd. Op d’r truukwèg zunt v’r noch gesjopt bie ’n wègrestaurant. Dè ober dao wis neet watte hoeërt wie ich dao och ‘nne sjoes besjilde en dach dat ich gesjoate how. ‘Has doe gehört, er hat pang gemacht!’, me sjoes hub ich neet kriège.

’t Optrèje in Keu du Bois vergjet icg och vanzeliève neet mie. Dao wort d’r Pierre bokkig en wat koes d’r Martin sjpringe en marsjere tegeliek. Wat d’r Pjer in d’r kop kroog, dat wèet ich och neet, me ’t zal wal de sjuld van d’r Twannie zie gewes. Want dè fludde alwer dat de harmenie moes blaoze, want dao sjtonge wer luuj langs d’r kaant – en v’r howwe pas driej reprieses gehowwe.

Ich bin vieftien jaor bie d’r drumband gewes en naodat ich getrowd bin en dao ’t universeel kado van d’r drumband how kriège (‘nne poef) en in Mhaer bin gon woene, is mich langzaam d’r zin an d’r drumband euver gegange. Ègelik och umdat d’r Demolling d’r kaffee toe makde. Doe koes v’r zoondesmeuriges es v’r os ène gonge drinke, neet mie dè lekkere reuk van de sop en de erpele ruuke en och neet mie mit lekkere honger op hèèm aan goa.
En – mesjien maog ich ’t neet zègge – ich wort och ’n bietsje meuj van dat gesjrieew van d’r Frans op m’nne vrieje zoondig. Want dao koes dè Frans og get va.