Gesjiech ven Lèmbörg

Politiek waor Limburg ummer wie 'ne lappedeke, boemet veur e deil de groete versjèlle tösse de dialekte oetgelag kinne weure: eder gemeinte heet z'n eige dialek, boebij deks binne ein gemeinte (zuug Venlo) nog groete versjèlle kinne bestoon.

Pas in d'n Fransen tied, dee begós mèt de Franse vereuverink vaan Mestreech in 1794, woort 't gebeed tot 'n bestuurlike einheid gemaak. In 1815 bij de vörming vaan 't nui Koninkrijk der Nederlande kraog ein vaan de provincies de naom Limburg. De keuning Willem 1 waor ouch hertog vaan Limburg mer heer had gei land dat zoe hètde. Daorum neumde heer, es verlicht despoot, 'n stök land wat van häöm waor, zoe. De naom góng trök op dee vaan 'n aajd hertogdom, dat e gebeed in d'n triangel Maastreech-Aoke-Luik besloog en dat tot 1648 had bestoon.

Bij de sjeijing vaan Nederland en 't Belsj in 1830 kaom de kwestie aon de orde of Limburg e deil vaan 't Belsj zouw weure - wie de meiste Limburgers ziech 't winsde. Oeteindelik woort Limburg in 1839 verdeild in 'n Nederlandse en 'n Belzje provincie. Nederlands-Limburg waor vaanaof dat moment es Hertogdom Limburg tot 1866 deil van de Duutse Bond.

De provincie bleef de titel Hertogdom tot 1906 gebroeke. 'n Aander Limburgse biezonderheid in de titulatuur is tot op d'n daag vaan vaandaog blieve bestoon: de commissaris van de Koningin hèt hei gouverneur.

De Nederlandse euverheid erkint de oorspronkelik in Nederlands Limburg gesproke variëteite oonder de naom Limburgs es streektaal.