Algemein Verklaoring vanne Mienserechte

Rizzeluusje 217 A (III) vanne Algemein Vergaring van 10 dieëtsember 1948

Algemein Verklaoring vanne Mienserechte

Aafkunjigingsformeleer

Dewiel de erkènning vanne aangebaore waerdigheid enne gelieke en ónvervraemjbaar rechte van alle leje vanne gemeinsjap van miense de gróndjlaag van vrieheid, gerechtigheid en vrejen inne werreld bildj,

dewiel de verónachzaming en verachting vanne mienserechte toet barbaarse hanjelinge höbbe gelèdj, die 't gewete vanne miensjheid mit veróntwaerdiging vervölle, en wo verkunjig woren is det veur 'ne werreld, worin miense vrieheid van meiningsuting en geluif en vrieheid taenge sjrump en noead genete, 't hoogste streve vanne miens guldj,

dewiel 't nuuedig is de mienserrechte dore rechshieërsjap te besjötte, es de miens neet wuuertj gedwóngen es litste middel toet opstandj taenge tyrannie en óngerdrökking te mótte griepe,

dewiel 't nuuedig is de óntwikkeling van vrundjsjappelike betrèkkinge tösse de völker te bevördere,

dewiel de völker vanne Vereinigdje Naasjes in 't Handjvès häör geluif inne gróndjligkendje mienserechte, inne waerdigheid enne waerd vanne miensjelike persoean en inne gelieke rechte veur manskaerel en vrouwmis oppernuuj höbbe bekreftig en beslaoten en sociale veuroetgank en baeter laevesstanderden in grótter vrieheid te bevördere,

dewiel de Lidstaote zich höbbe verplich in samewirking mitte Vereinigdje Naasjes oppe algemein inachnumming en bevördering vanne mienserechten en gróndjvriehejen aan te wirke,

dewiel e gemeinsjappelik verstandj van dees rechter en vrieheje van groeat belank veure vol vervölling van de beläöfdje is,

verkunjig de Algemein Vergaring

dees Algemein Verklaoring vanne Mienserechter es 't veur alle völker en lenjer te bereike gemeinsjappelik ideaal, womit ederen individuelen en al de organe vanne samelaeving zich dees verklaoring ummer inne kop hajen en zich inspanne, door óngerrich en optrèkking de inachnumming van dees rechter en vriejheje te bevörderen en door veuroetkómmendje nasjenaal en internasjenaal maotregelen häör algemein en taatsechelike erkènning en inachnumming dore bevölking vanne Lidstaote zelf esuch dore bevölking van häör óngergesjikdje landjsgebiede te waorborge.

Artikel 1

Alle miense zeen vrie en geliek gebaoren in waerdigheid en rechte. Ze zeen bedeildj mit raejen en geweten en mótten einanger inne geis van brodersjap bejaengene.

Artikel 2

Edereine maak aanspraok oppe rechter en vrieheje die in dees verklaoring staon verkunjig, sónger ènnig óngersjied, wie naw rasj, hoedskluuer, geslech, spraok, geluif, politische of waatfer uvertuging denouch, nasjenalen of sociale kómaaf, vermeuge, gebaordje of welche standj denouch.

Wiejer maag gein óngersjeid waere gemaak opgróndj politische, rechterliken of internasjenale staot van e landj of e landjsgebied, wotoe 'ne persoean behuuertj, of det noe ónaafhenkelik is, ónger voogdie steit, gein eige regering bezitj of ónger waatfer soeverein bepirking denouch steit.

Artikel 3

Edereine haet 't rech op laeve, vrieheid en persoeanszekerheid.

Artikel 4

Geine maag in slavernie of liefeigensjap waere gehaje; slavernie en slavenhanjel zeen verbaojen in alle vörm worin zie zeen.

Artikel 5

Geine maag waeren óngerworpen aan marteling of kruue, ónmiensjelike of vernederendje behanjeling of bestraofing.

Artikel 6

Edereine haet 't rech euveral es rechsbeveug te waeren erkandj.

Artikel 7

Alle miense zeen veure wèt geliek en höbbe sónger óngersjied aanspraok op gelieke besjurming dore wèt. Zie höbben allenej aanspraok of gelieke besjurming taengen eder discriminering die inbreuk duit op dees Verklaoring en taenge eder ophitsing toet zólche discriminering.

Artikel 8

Edereine maak aanspraok op 'n wirkzaam beroopsmeugelikheid bieje beveugdje nasjenaal gerichte taenge hanjelinge die de gróndjrechte die dem zeen verlieëndj wore dore gróndjwèt of 'n anger wèt.

Artikel 9

Geine maag willekäörig waere aangehaje, vasgezatj of verbannen oet 't landj.

Artikel 10

Edereine haet bie 't vasstèlle van zien rechter en plichte, zowie bie 'n straofrechterlike besjöljinge die taenge dem löp in vol geliekheid aanspraok op 'n gerechte en äöpelike rechszaak veur 'n ónaafhenkelik en ónpartiejig gerich.

Artikel 11

1. Edereine dae door 'n straofbaar hanjeling wuuertj besjöljig haet 't rech es 'nen ónsjöljige te gelje zolang ziene sjöld neet in 'n äöpelik vervaren aldus de wèt naogewezen is, zodet t'r al veur zien verdeidiging noeadwenjige garansjes haet gehadj.
2. Nemes moog door 'n hanjeling of óngerlaoting waere veroeardeildj die t'r tied van zien begejjing nao nasjenaal of internasjenaal rech neet straofbaar waas. Aevezoea maag gein zwaorder straof es die die op 't tiedpuntj vanne begejjing vanne straofbaar hanjeling gólj waeren opgelag.