Hoempa

Van Wikibrónne

Van: Huub Brouns


Refrein
Bes - se - me !!!
Zoeë sjaldje Hoempa door de sjtraote.
Bes - se - me !!!
Det galmdje tösse Pieël en maas.
Mien bes-se-me
zulle d’n drek neet ligke laote.
Mer as ’t kaere is gedaon,
laot ze den leefst neet boete sjtaon,
as hekse saoves vlege gaon.



Sjang Op ’t Veldj dae trapdje ziene bakfiets,
vol zelfgebónje besseme gelaa.
En bie ’t traeje van dae bessem-riksja
klónk óngerwaeges monotoon zien “hoem-pa-pa”.
Mèt bessemwerk van hei en brum en birke
waas Sjang allein as Hoempa hie bekandj.
Bie sjlappen hanjel góng d’r mer get wirke,
op eine boerenhaof
in sjtal of op ’t landj.


D’n äöverdèn waas dök zien hemelbèdje
mer somers sjleep d’r inne boetelócht.
Wól hae get werk, den mook de boer ein wèdje,
det al nao twieë daag Hoepa weer de vrieheid zócht.
Mer toen de blinje platte bessems bónje,
versjpeeldje Sjang zien vrieheid en zien broeëd.
In Deurne aan ’t Labberhoes gebónje
bleef Hoempa rösteloos en góng d’r sjtilkes doeëd.

_________________________________________________

                                                                      Huub Brouns, Naer