Kinger sjrieve plat

Van Wikibrónne
Naar navigatie springen Naar zoeken springen

’t Limburgs is ’n gans vitale taal die se gelökkig nóg edere daag en op allerlei plaatse heurs. Limburg haet daomèt ’n unieke plaats in Nederlandj: in gein ènkele provincie wurd nóg zoväöl dialek gekald. De kans dat leerlinge ouch in de klas Limburgs sjpraeke, is daorom heel groat.

Ómdat d’r nóg zoväöl Limburgs gesjpraoke wurd, wurd d’r ouch väöl gesjreve in de versjillende Limburgse dialekte. Dat gebeurt veural door volwassene. Mer woróm zouwe kènjer neet in ’t dialek kènne sjrieve? Dao wille ver mèt dit initiatief get aan doon. ‘Veer’ zeen in dit geval de redactie van ’t Platbook. Die besjteit oet Limburgstalige sjrievers en de sjtreektaalfunctionaris van de provincie Limburg. ’t Platbook is ’n bokereeks in ’t Limburgs, dae op initiatief van ’t Hoes veur de Kunste Limburg wurd oetgegaeve.

Laot uch leerlinge oet uche klas ‘ne teks sjrieve van maximaal 600 weurd in hun eige dialek. Dat kènt ’n gedich zeen, mer ouch ’n kórt verhäölke. In de keuze van ’t óngerwerp zeet ger vólkómme vrie. Mer wilt ger mèt ’n bepaald thema wirke, dan zout ger kènne dinke aan de Kènjerbokewaek, die dit jaor es óngerwerp helde haet. D’r zeen alledaagse helde, helde taege wil en dank en superhelde. Euver edere held is d’r waal ‘n verhaol te vertille. Dat kènt in ’t Hólles, mer natuurlik net zo good in ’t dialek. Messjiens is dit in ’t begin effe wènne, mer dat geit waal lökke. Tips veur ’t sjrieve van ’t Limburgs kènt ger vènje op www.limburgsedialecten.nl (ónger ‘Limburgs sjrieve’). Advies euver ’t sjrieve van de Limburgse dialekte kènt ger natuurlik ouch altied kriege bie de sjtreektaalfunctionaris (streektaal@hklimburg.nl). Dao is ouch de gratis bokelègger mèt de sjpellingstips te kriege.

De biedrage waere beaordeild door Annie van Gansewinkel. Zie publiceert jeugliteratuur, ónger angere ouch in ’t Limburgs (kiek ‘ns op www.annievangansewinkel.nl). De biste tekste waere aafgedruk in Platbook 7, dat in de tweede hilf van dit jaor zal versjiene. De presentatie van ’t book krig natuurlik ’n feestelik tintje.