Nationale streektaalconferentie

Op 16 juni woeëd durch d'r Road veur 't Limburgs en Bureau Sjtreektaal in de Sjtatezaal van 't Gouvernement in Mastrich de ieësjte nationale sjtreektaalconferentie gehoade. Sjpraekesj woare o.a. d'r Commissaris van de Kuëningin in Zeeland drs. W. van Gelder, Europarlementariër drs. L. van Nistelrooij, deputé van kultoer van de Provincie Limburg mw. O. Wolfs, deputé van kultoer van de Provincie Noord-Brabant W. Luijendijk, Oad Algemeen Secretaris van de Nederlandse Taalunie prof.dr. K. Jaspaert, expert móddertaaldidactiek prof.dr. S. Kroon en J. Braun, lid van d'r Conseil Permanent de la Langue Luxembourgeoise. 's Middigs woar ing paneldiscussie woarin leë van Provinciale Sjtate van Limburg en sjtreektaalfunctionarisse oet Nederland en Vlaanderen ónger leiding van Frans Pollux in discussie gónge.

Óch woeëd op dizze daag aafsjeid genoame van sjtreektaalfunctionaris dr. Pierre Bakkes.

De laezinge van d’r daag zunt noe in e book gebundeld. ‘t Book bevat óch ing i-leiïng op ‘t thema durch de redactie, Roeland van Hout en Ton van de Wijngaard, en e versjlaag van de paneldiscussie oet ‘t middigprogram.

Bibliografische gegaeves: Roeland van Hout, Ton van de Wijngaard (red.), Lang leve de dialecten. Streektaalbeleid in Nederland. Bureau Streektaal Nederlands-Limburg/Uitgeverij TIC. Roermond 2006. 110 blz. ISBN 90-78407-11-5. Te besjtelle bij: Uitgeverij TIC in Mastrich of bij Bureau Sjtreektaal i Remung. Pries: 12,50 euro.