Sint Servaes legende/Dèrde book IV
‘Men mach in menghen synnen
Gods heerscapie bekennen,
Sijne ghenade ende sijne ghewalt.
Ghij siet wale wie der wynter kalt
Die eerde bevroret
Ende haer vrocht testoret
Ende tewrijvet ende verkeert;
Ende als hij dan henne veert,
Ende der somer aen gheyt,
Dien alle die werelt gherne ontfeyt,
Ende daer toe alle creatueren,
Eyn yeghelijck nae sijnre natueren,
Verhoghen sich ende vervrouwen.
Allen die Gode ghetrouwen
Ende doer hem lijden arbeit,
Dien gheeft hij grote rijcheit,
Woninghe in hiemelrijck
Ende vroude ewelijck.’